政壇：搞搞政：立會司法委員會 梁美芬勢冧莊主席

去年九月各黨派就立法會各委員會正副主席人選協調時，建制派原建議一人做兩年司法委員會主席，頭兩年由上屆做開副主席嘅梁美芬「坐正」，臨尾兩年就由大狀黨嘅法律界議員郭榮鏗（Dennis）接棒，不過壟斷咗呢個位多年嘅大狀黨，就反晒枱話佢哋一定要做足四年，並聯同其他泛民故意喺選舉主席時玩嘢，差啲玩殘當時經驗不足嘅梁美芬。一年過去，據聞建制派暫無意中途換人，有傳律政司亦力撐梁美芬連任。大家梗係以為律政司嘅取態係同政治有關，擔心大狀黨做咗主席會就法治問題狂插政府，但其實律政司嘅主要考慮，係認為由執緊業嘅大狀擔任委員會主席，可能會出現利益衝突同偏頗。

其實有關佢哋偏頗嘅例子好多，例如委員會早前討論投訴法官機制同改革終審法院上訴制度時，班有律師或大律師背景嘅泛民委員，就只顧批評部分法官成日鬧佢哋班法律界同業，又反對收緊涉額一百萬元嘅訴訟可自動上訴至終院嘅制度，以免減少同業打官司賺取律師費嘅機會，冇乜點從訴訟人同納稅人嘅公眾利益出發。