政壇：譚香文亂咁叫人道歉
特首梁振英日前話，市民向廉署舉報後若證實無證據，投訴者應該向被投訴者道歉，呢個「道歉論」引起廣泛討論。人民力量譚香文（Mandy）今日會踩去政府總部，要求梁振英為佢主持公道。
Mandy話原來佢○八年循會計界參選時，被對手陳茂波嘅助選團成員林智遠（Nelson）去廉署告佢涉嫌觸犯選舉舞弊，但最終法庭還佢清白，按照同一道理，梁振英應該責成Nelson向佢道歉喎。
Mandy話，當年陳茂波兩位助選成員林智遠同周嘉亮向廉署投訴佢，喺選舉前舉行一個免費會計講座，涉嫌觸犯選舉舞弊。Mandy話就算最終告唔入，已經搞到佢好大困擾。既然CY認為投訴人告唔入就要向被投訴者道歉，咁當年有份告佢嘅兩位仁兄，都好應該向佢道歉。
我哋問過Nelson，話對譚香文講法好莫名其妙，首先佢同太太兩人都唔係報案人，周嘉亮先係報案人，自己只係有份出庭作供。第二，如果人力認為CY嘅道歉論係唔正確，咁Mandy又點解要投訴人道歉呢，咁咪間接承認梁振英講法係正確？
