政壇：千金閃婚畀胡志強驚喜
台中市長胡志強率領一班台中糕餅業者來港做推銷員，仲擔正太陽餅代言人一角色。尋日八號風球掛咗半日，佢都風雨不改，獨生女胡婷婷同老公Julio、即澳門混血雙胞胎歌手組合Soler中嘅哥哥亦突然現身助陣，氹到胡志強笑呵呵，佢話做台中市市長已十二年，囡囡從未試過公開為佢撐場，但前晚阿女同女婿由美國返港，臨時決定畀個驚喜佢，唔怪之得佢甜到漏啦。
胡婷婷（中）拖實新婚老公Julio（右）現身撐場，胡志強（左）開心到暈。
被視為台灣政壇明星嘅胡志強尋日又為太陽餅助威，話十年來太陽餅銷量勁升三十三倍，茶葉就增長五倍，成績都算唔錯。問到胡婷婷港台兩邊走，佢話今次撞啱丈夫返港公幹，所以就嚟探爸爸。講起呢個市長之女，似乎台灣政壇千金都好有個性，馬英九嘅長女馬唯中低調結婚之外，胡婷婷年初亦閃嫁Julio，胡志強喺兩人婚前十幾日至知情，認真「驚喜」。
