政壇：議員考察台日歎風味餐
立法會扶貧小組委員會今個月將會去台灣同日本考察，十位議員下個星期就會出發。小組委員會就計劃咗下星期三會去宜蘭縣，原來佢哋會去當地嘅文化館同王公廟，可以玩埋紙藝DIY之餘，仲有社區風味餐食添，唔知嘅話真係會以為班議員係去觀光旅遊。
小組委員會喺台灣會有三日行程，其中一日嘅下午就係去宜蘭縣五結鄉，參觀同拜訪當地嘅宜蘭縣大二結文教促進會同社區營造中心，以了解當地點樣透過創造本土就業機會去改善貧窮情況。班議員就會先出席一個座談會，跟住就會去二結殼倉稻農文化社同王公廟參觀，仲可以喺大二結紙文化館體驗紙藝DIY，做吓小手工。
不過所謂民以食為天，最吸引嘅可能都係當地安排嘅社區風味餐，議員可以揀赤肉、薑汁燒肉、牛腩同鱈魚，都算幾多選擇。今次嘅團長馮檢基就話，行程係立法會秘書處同台灣接待當局聯絡，由台灣方面根據佢哋關注嘅議題安排嘅。秘書處咁早畀定參單議員，睇怕都係驚議員花多眼亂，耽誤行程喇。
