梁振英周日會到觀塘功樂官立中學會見市民，警方昨已派員到場視察。
繼出席天水圍公眾論壇後，特首梁振英（CY）將會喺來緊嘅星期日再落區，去觀塘同市民見面。雖然離CY落區尚有幾日，啲團體已紛紛號召着乜衫出席，社民連聲稱會着白衣對抗黑勢力；人力同熱血公民都會各自呼籲支持者穿着佢哋嘅黃色制服踩場。如果市民唔想畀人當示威者，唔使睇通勝都知不宜着黑色、白色同黃色衫啦。踩場團體早作準備，據知警方都計劃派三百警員到場，當中包括反黑組亦要出動。
上次CY落天水圍，就出現衝突同打鬥場面，一班民主派就大鬧警方執法不公，甚至話警方縱容黑勢力挑釁反政府人士。故此行開激進路線嘅社民連同人力今次就轉性玩溫和，除咗着白衣同黃色制服作意識形態抗議外，前者會靜默站立、唔叫口號、唔舉示威牌，後者就會效法馬丁路德金手拖手步行，仲宣稱會打不還手，以凸顯政府同警方縱容黑勢力、選擇性執法咁話。
不過熱血公民黃洋達就唔同意社民連同人力嘅做法。佢話CY就係唔想佢哋啲反政府人士出聲，如果選擇沉默，就等於中計咁話。所以佢已經召集緊支持者當日踩場，仲話就算有肢體衝突都係意料之內添。
第一手消息請下載on.cc東方互動
