政壇：陳淨心累人賠八千蚊
香港政圈近來湧現唔少新興勢力，其中備受矚目嘅梗有愛護香港力量（愛港力）一份，佢哋嘅主將陳淨心更因為一招企枱指罵，名噪一時。早前，香港青年時事評論員協會（青評會）舉辦論壇，邀請各路英雄商討普選，愛港力都係應邀嘉賓之一，同場仲有因國教一事走紅嘅黃之鋒，論壇上雙方已經不斷過招，之後陳淨心更忽然發功，跳上枱猛揮五星旗，在場幾幫人隨即上演大混戰。會場變戰場，戰後隨處可見爛枱爛櫈，邊個要負責？主辦團體青評會事後被場地擁有人索賠八千幾蚊，佢哋唔會向陳淨心等人追數，惟有「骨」一聲吞咗佢。
設計圖片及對白
青評會當日係向「Good Lab」借場搞論壇，最近佢哋收到「Good Lab」寄嚟嘅帳單，言明物件損失要收八千幾蚊，青評會主席周浩鼎（Holden）話，會同一班兄弟啃咗佢，都唔叫愛港力找數，費事同佢哋再有來往喎。
貼牛皮膠紙 牆身花晒
講番當日論壇，雙方出席者原本頻頻過招、火花四濺，本來只限口角，但去到尾聲陳淨心突然不能自控，跳上枱猛揮五星旗，之後幾幫人同時大混戰，結果一輪狂風掃落葉，個場好似打完仗咁，整爛咗十張櫈、兩張枱。現場秩序大亂，青評會最後都不得不腰斬論壇，估唔到事隔咁耐仲有手尾跟。
點解整爛幾張櫈就要賠八千蚊？原來部分電視台都要負責，話說當日大戰前夕，唔少電視台攝影師為咗收音好啲，將啲咪貼喺天花板喇叭，而咪線就用牛皮膠紙貼緊牆身，點知一拎走張膠紙，牆身油漆即刻花晒，呢筆帳當然入埋周浩鼎數啦，明明唔係佢整爛又要賠錢，今次佢都算慘。
