城中鏡：李家祥收山避談政
李家祥唔肯好似以前咁成日評論時事。
立法會前會計界議員Eric李家祥自○四年闊別議會後，除出任少數公職同兼任多間上市公司董事外，都鮮有出席公開場合評論時事，佢話依家最鍾意環遊世界，單係今年已經飛咗兩轉北歐同兩轉南美洲，對於香港依家搞分化「立立亂」，佢顯然唔想多講，仲暗呻「講咗二十年都冇人聽」添！
李家祥唔肯好似以前咁成日評論時事。
話唔講啫，但Eric覺得特首CY梁振英前日落區絕對「勇氣可嘉」，觀乎依家形勢，無論落唔落區都會面對無數負面批評同衝擊，加上時代唔同咗，唔少人對政治「熱情咗」，難怪會出現辱警、郁手打人嘅亂象。對於CY前日落區嘅表現，佢就成個唯唯諾諾、不願置評咁款，暗呻以前成日評論時事，但「講咗二十年都冇人聽」，依家收山唔講喇。
當年同屬「早餐派」嘅前工程界議員何鍾泰就唔介意講兩句，佢引用英文諺語「let the sleeping dogs lie」，話近日發生咁多衝擊事件，希望社會唔好再將佢炒熱，以免再引起軒然大波，到時又搞出大頭佛就無謂啦！
