城中鏡：梁繼昌變黑超特警
公共專業聯盟立法會議員梁繼昌變咗「黑超特警」？佢尋日喺社交網站上載張戴咗黑超嘅自拍照，原來佢唔聲唔聲，做咗個視網膜修補手術。
佢唔係特別安排喺立法會放暑假做眼部手術，而係突發嘅。佢話自己係深近視一族，右眼有成七百幾度近視，早前進行定期眼科檢查時，醫生話佢知佢視網膜有事，如果情況持續惡化，過多一至兩年就會完全睇唔到嘢。
梁繼昌聽到後即時嚇咗一跳，去完倫敦旅行返港後急急腳同醫生約時間做激光手術，手術做咗個幾鐘，麻醉咗進行，所以唔覺痛。佢話未來一至兩日都會戴住副太陽眼鏡返立法會開工，原因係要保護右眼，免受太陽直接照射。佢認為一定係自己睇得書多，所以眼有事喎！
