城中鏡：孫公偕妻恩愛試「鏡」

入到去，孫公就坐喺櫃位前，店員好熟練咁攞兩副眼鏡出來試戴。經過簡單嘅調校後，不消幾分鐘，店員就搞掂孫公嗰副眼鏡。接住輪到孫太坐低試戴，話咁快就調校好晒，兩公婆睇嚟好滿意，即刻戴住新簇簇嘅眼鏡離去。驟眼望去，仲以為佢哋佩戴情侶眼鏡，但望真啲，其實都有些少唔同嘅。

幫襯30年 夠長情

孫太話佢哋係去配可隨陽光強弱而變色嘅漸變眼鏡，仲讚孫公好啱戴有框眼鏡，顯得後生又靚仔，氹到孫公笑呵呵。話時話，佢哋幫襯嘅眼鏡店已開業幾十年，孫公幫襯都有三十年，咁多年來無論間店舖搬去邊，佢哋就跟到邊，好長情。當日佢哋配嘅係名牌眼鏡架，一副要成五、六千元o架！

講起最近政府收緊政治委任官員嘅利益申報指引，孫公話官員利益申報一向有機制，如果按正常規定清清楚楚申報，就唔會有問題。一提起政治，孫太就唔想孫公講太多，寧願講吓風花雪月就算。孫太話兩公婆都已退休，無嘢做，所以經常周圍去，佢就啱啱同孫仔去日本玩。不過今次孫公冇跟住去，留喺香港休息喎！