SUN搞作：打橫嚟講：唔識嚇死，識就笑死
哈哈！真係笑爆嘴，一個逗緊人民血汗金錢嘅公僕，間中同老婆出街食飯、買底橫，甚或揸車經過，咁樣就叫做「微服出巡」？哈哈！唔識嘅就嚇死，識嘅就笑死囉！
「微服出巡」，封建用語也。中國古時帝制年代，只有皇帝才有資格話「微服出巡」！當然，有人壞了腦，以為可呼喚爛仔黑人物打人，就當咗自己豢養御林軍咁至尊無上，做咗皇帝，咪「漏了嘴」，罕有的說心裏真話，也不出奇！
「微服出巡」，是「微服」與「出巡」兩詞彙組成。先講「出巡」，「巡」者，現今解作「往來查看」，原屬「君王周圍行走的視察」。古語「巡幸」，便是「舊謂帝王到外地遊玩巡視」之意也！「巡撫」，更是個官職名稱。「出巡」，咪係「出訪巡察」囉！
「微服」，據《辭源》注釋：「為隱蔽身份而更換平民服裝，使人不識。」嗱！寫明「換平民服」，即那隱藏身份的人，並非平民啦！唔係皇帝，都係皇親國戚矣！至少，都係身份特殊，唔想畀人知的權貴！
要「微服」外出的人，不一定去視察民情的人，《辭源》「微服」一條內，引述三國時期，曹操要微服東出避難，因怕仇家追殺囉！佢太乞人憎矣！
喺香港特區內，同老婆出街食咖喱就當自己「皇帝微服出巡」是否很反智呢？若去買條魚都要「微服」咁鬼鬼祟祟，應否反思吓自己做過乜嘢壞事劣行，點解咁不受歡迎？怕人知自己出現而被圍剿，遂學曹操「微服」避難o架呢？
有十多個保鏢跟身都唔敢出入正門的人，都係蒙面出街安全啲咯！哦！或者留在室內，做鍵盤寫手便算了！
彭志銘
次文化考古學家，對城中潮語有深入研究，博徵博引，廢官廢人行埋一邊。
歡迎add我facebook一齊（目及）實政府
