SUN搞作：少膽虫手記：返工唱歌傷風敗德
「我會否好像這樣生於世上無目的鞭撻……」肥豪同蘇哥呢排歌神上身，成日哼歌哼到成層樓都聽到，你話餘音裊裊就話啫，可惜佢哋令到少膽虫想死鳥！有見及此，少膽虫決定動員心腹單單打打，務求將惡俗之聲趕絕於耳！
「看吧人民在挽手爭取正義和自由……」佢哋一唱，虫仔虫女就將音量較最高到播《狗噏24》，不消一刻，成個金正恩咁款嘅淫黎，昂揚嘅演說傳遍成層《爛果》，見到腦細，肥豪即刻the晒皮！蘇哥好似第一日出嚟做咁，頭岳岳繼續唱，見佢咁乞人憎，有隻醒目嘅虫仔索性將淫黎用完嘅舌針拮喺佢條脷度，再將佢一腳踢出堆填區！
臨放工嗰陣，垂頭喪氣嘅肥豪，加多件黐晒成身垃圾嘅「堆填蘇」喺門口攔住少膽虫，肥豪眼濕濕咁問，「腦腫，我哋搞成咁，係咪你指使o架？」少膽虫微笑搖頭，「你咁樣同好假嘅肥仔有咩分別！」傳出陣陣幽香嘅「堆填蘇」不忿大罵，少膽虫都無話過要與民為敵，只不過係唔想爛果嚴重撕裂啫，更何況佢哋啲歌唔啱聽吖嘛！「腦腫，你想唔想知，點解我哋永遠都鬥唔過正義傳媒？」見好似有啲嘢聽，少膽虫批准佢講落去，「因為你留守過去嘅想法，永遠都只係一個專制者！」
