政壇：搞搞政：張宇人再掌財會抗拉布？

至於臨時變陣嘅背後原因就眾說紛紜喇！有人話張宇人做慣做熟，不如做埋落去，來年要替泛民「剪布」都熟手啲。但亦有人覺得係泛民攪局，明知佢哋就算派出做過多年財委會主席、而且口碑唔錯嘅白鴿黨劉慧卿競逐主席都係輸硬，倒不如夾埋富貴黨五票，支持相對溫和嘅張宇人連任，等泛民可以喺來年財委會繼續「拉布」，唔使畀立場保守嘅星爺迅速「剪布」。

我哋問過兩位當事人，星爺話一切隨緣，唔會主動游說其他議員支持，但如果有人提名佢做主席，亦願意一試，而且一定力阻拉布，強調財委會係負責審批撥款，而唔係畀人不停問問題。

張宇人就講到好唔想連任咁，強調自己絕對尊重舊年達成嘅共識，無諗過連續做兩年，總之一日有人提名星爺，佢一定唔會同佢對撼，以免分散建制派票源畀泛民「執死雞」。但星爺如果唔出選，佢係咪會當仁不讓呢？佢亦話無咁嘅打算。不過亦有人質疑，實情可能真係張宇人唔想做，但佢所屬富貴黨想佢繼續做落去霸住個位，先至傳出有關消息。