政壇：謝偉俊望搣封號博支持
謝偉俊
立法會議員Paul謝偉俊自從舊年自爆獲中聯辦拉票助選，「西環契仔」呢個封號就搣極都唔甩，雖然佢承認同中聯辦關係良好，但尋日接受立會同僚劉慧卿訪問時，就希望大家叫佢「香港之子」開心啲，仲話歡迎各方人士支持自己添！似乎想食多幾家茶禮多啲，難怪卿姐反諷佢小心叫錯做「香港之『恥』」。
謝偉俊
講到中聯辦，Paul不忘話自從舊年公開呼籲中聯辦官員，唔好出席咁多地區活動後，中聯辦收斂咗好多，主任張曉明除表明官員出席活動唔再收禮外，擔任主禮嘉賓嘅應酬式露面更可免則免。不過，中聯辦轉走低調路線完全係因為國家政策有變，只係跟隨內地嗰套厲行簡約節儉，完全唔關「契仔」事。
阿Paul出任議員咁多年都係維持「獨立」身份，佢坦言多年來喺議會單打獨鬥係好難做，但諗嚟諗去都係唔打算入黨，因為「太多群體唔係好啱我」，原來佢鍾意孑然一身唔埋堆。
