政壇：周一鑊縮骨性格早養成
唔知周一鑊小時候有冇諗過自己會做咗「炒家」呢？
唔少人細個嗰陣都有寫過「我的志願」，平等機會委員會主席周一嶽兒時嘅興趣都好廣泛。尋日佢出席一個活動時，就自爆細個時曾經想做歌唱家、畫家同運動家，但樣樣只得半桶水，最後當然三樣都做唔成，反而做咗「炒家」。點解？因為佢叫做「周一鑊」囉！
唔知周一鑊小時候有冇諗過自己會做咗「炒家」呢？
周一鑊繼續自爆童年趣事，佢話曾經係反叛兒童，次次默書都攞零雞蛋，又經常欠交功課，結果畀老師罰抄「我要記得做功課」。點知佢竟然不知悔改，連罰抄都懶得寫，畀老師加倍懲罰，二十句變成八十句，多到連佢爸爸都忍唔住話要出手幫佢抄埋一份。
最後「周一鑊」只好乖乖就範，但依然諗埋啲古靈精怪嘅奇招應對，就係將四支筆綁埋一齊罰抄。唔知佢用四支筆同時寫出嚟嘅字，老師收唔收貨呢？最搞笑係佢話自己寫寫吓罰抄，竟然抄到上咗癮，自此開始做番功課，總算冇白費佢老師嘅一番苦心。
