政壇：廖秀冬照腦解多年謎團
廖秀冬照磁力共振拆解患病之謎。
前環境、運輸及工務局局長Sarah廖秀冬離開官場後，加入港大擔任校長資深顧問（可持續發展），原來一直有讀寫障礙，但佢排除萬難苦學成才，經驗多到夠出書。尋日佢就以過來人身份，出席由東華三院同恒生銀行合辦嘅「讀書無障礙計劃」，大爆當年曾經為咗找出患病之謎，搵專家照腦。
廖秀冬照磁力共振拆解患病之謎。
Sarah憶述，自細寫字成日掉轉晒，老師好厚道話：「當你寫啱啦」，但仍然令佢極之困擾。後來佢囝囝蕭偉中都患上同一障礙，而且問題比佢更嚴重，兩母子用盡方法記字，但始終搞唔掂，質疑自己個腦袋到底搞錯咗啲乜？後來佢搵到加州一位特殊教育專家，幫佢用磁力共振照大腦，分析佢串字時，腦袋有乜異樣，最後得出結論係，讀寫障礙係一種機能障礙，唔關知識事。認清問題後，佢確信腦袋無事，只要搵啱學習方法，一樣可以戰勝障礙。
佢又鼓勵家長多體諒有讀寫病的子女，好似佢個仔咁，雖然寫字倒轉晒，但音樂同打機天分高，有次為咗拆解打機秘訣，苦讀日文，最後花半年成功考取日文文憑資格。再問佢對現任環境局局長黃錦星有乜評價？佢就三緘其口話無嘢發表喎！
