政壇：梁卓偉向政府說不
設計圖片及對白
做過食物及衞生局副局長同特首辦主任嘅Gabriel梁卓偉，自從喺政府熱廚房抽身而退後，可謂樂得逍遙，重返香港大學醫學院後繼續扶搖直上，今個月起仲接替約滿離任嘅李心平，出任新一任醫學院院長。佢尋日同傳媒茶敍時，大家都好有興趣知道佢對近期社會對立、政局混亂有咩睇法，但佢就擺出一副「不在其位，不謀其政」嘅樣，話自己已無做政府，對政事三緘其口，仲話「最近幾日睇報紙都唔睇嗰幾版（指政治新聞）」。
設計圖片及對白
百分之二百肯定
Gabriel為官期間風評唔錯，係上屆政府最為人熟悉嘅副局長，之後被提拔為「大內總管」。不過，舊年換屆後佢無再留任，反而重返港大執教鞭，短短一年就做埋港大史上最年輕嘅醫學院院長，大家都覺得四十出頭嘅佢喺政壇仲大有可為，尋日就有人問佢會唔會做完五年院長任期，言下之意係如果有適合位置，會唔會考慮再入政府？佢就一口否定，話未來五年都只會將「百分之二百」嘅心機放喺大學發展，又講笑話自己過去三年轉咗三個崗位（副局長、特首辦主任及港大教授），希望大家今次畀佢做耐少少喎！講到咁決絕，即係向政府說不，唔會再食回頭草啦！
剛上任醫學院院長，Gabriel已有滿腹大計，除咗計劃趁瑪麗醫院重建嘅契機，擴建同重組沙宣道附近嘅醫學院建築群，已有一百二十六年歷史嘅港大醫學院亦將於其任內邁向一百三十周年，佢話遲吓會搞多場論壇聽聽學生、教職員同校友嘅期望，實行廣集民意，最後仲贈咗大家十二字真言，話係每日用嚟自勉嘅目標，就係：「虛心學習，固本培元，求實創新。」其實呢三句話套用番喺今日嘅香港都好適合，唔知現任官員又會唔會從中得到啟發呢？
