潮語「惡搞」嘅意思，並唔係好難搞咁解，而係解作一啲喺網絡發表嘅二次創作，用以譏諷原作者或恥笑他人。呢啲「惡搞」作品有時係一啲改圖，有時係將一啲短片重新剪接，又或者係改歌詞重唱。
最近同好多人傾開香港時局，大家都相當悲觀。有啲朋友話呢一年幾係回歸以嚟最亂最黑暗嘅日子，甚至衰過2003年沙士嗰陣，起碼嗰陣時全個社會一齊捱，無論有錢人冇錢人大家都冇得撈，最重要係嗰時火鍋生料碟碟$18，大中小點一律$12，樓平租又平。今時今日沒有最差只有更差，香港畀貪曾搞咗八年，以為會換個好啲，點知仲衰！家吓香港畀一班無誠無信兼無能，仲要甩皮甩骨不似人形嘅膠官不斷敗壞，甚至連以前令香港人引以為傲嘅老廉同警察依家都好似變晒質。自從中央政策組首席顧問邵善波話政府要製造輿論，制衡反對聲音之後，就多咗一批愛字頭人士搞到香港社會亂晒大龍，除咗移民之外真係諗唔到香港人仲有乜嘢出路。香港呢個亂局真係「惡搞」！
呢啲「惡搞」作品主要喺網上流傳，例如好多政府宣傳片都曾經被「惡搞」過。雖然「惡搞」有個「惡」字，但係多數都係無惡意，主要都係網民發洩一下情緒，但求一笑。不過亦有一啲係非常之過分嘅人身攻擊。例如最近嘅林老師事件，有網民將原本嘅網上片段「惡搞」，惡意為林老師配上另一句中文粗口，呢種行為絕對超出「惡搞」嘅程度，分分鐘可以構成誹謗。
喺香港地生活壓力大，加上超屈機嘅制度，政府當你臭四理得你死，網民得閒發揮創意「惡搞」一下，其實都無可厚非。但有時又唔可以低估「惡搞」嘅力量，好似當年唐唐約道大宅僭建事件，網民日日「惡搞」佢，搞到連特首寶座都失諸交臂。有時諗吓諗吓，如果當日係唐唐做咗特首，唔知又會係咩世界呢？
第一手消息請下載on.cc東方互動
