政壇：30警壓場嚇親范國威

僅40人參加 逾半屬記者

新民主同盟尋日朝早十一點喺沙田秦石邨舉行佔中論壇，佔中三子之一嘅陳健民出席做主講嘉賓。范國威一眾提早去到場地準備時，已有警員過嚟打聲招呼，佢哋不以為意，點知等到論壇開始前，現場已有七至八名警員，其後更一度有衝鋒車到場，大批警員落車，計埋現場便裝警員，約有三十人。

然而個活動嘅吸引力好麻麻，全場只得四十個參加者左右，其中超過一半係記者，論壇靜英英，全場得個四個提問，仲有一個人疑似係主辦方嘅添。大隊警員留咗一陣見冇動靜便收隊離去。范國威話，估計警方擔心議題敏感，恐有反佔中團體嚟「踩場」，所以主動派員駐守啩。睇番過去幾次佔中論壇及商討日舉行時，都有居民團體甚至愛字頭組織踩場抗議，有時更爆發罵戰、繼而肢體衝突，難怪警方都要頻頻出動。