SUN搞作：少膽虫手記：群眾的中指
老實講，《爛果》最唔需要就係讀者爆料，因為《爛果》已經有龐大嘅創作團隊，要幾爆有幾爆，任你嚟一打斯諾登定係兩杯思樂冰，少膽虫一貫拒諸門外，邊個爆料打邊個，做好腦腫把關職責。點知今日門口，又嚟咗一位家長……
「淫賤黎！少膽虫！我要爆你！」少膽虫立時掩得住生理上的弱點，但心理上的弱點，卻被狠狠捉住。「WTF（註：Welcome to false-media）！唔通少膽虫為自保炒人，依家冤魂索命？」少膽虫心道。嗰把元秋般嘅聲隨即又響起：「少膽虫！我知你匿喺堆填區！我貴為香城家長之首，你做乜要污辱我、唱衰我？」
少膽虫閃閃縮縮咁望出窗口，只見人群企滿成條街，而見到嗰位家長面貌之後，回憶咗一陣，確定無搭上過佢，就話：「傻咗咩？少膽虫自入宮侍奉淫賤黎，只有被污辱，都無污辱過咩人啦！何況師奶你？」話畢，天空霎時變色。「少你腦腫！少你腦腫！」憤怒嘅人群紛紛向少膽虫豎起中指，粗口大爆特爆，睇落去就好似世界上只有老師唔講得咁。
「少膽虫，出面咩事咁嘈？舉晒中指嘅？」淫賤黎聽到群情洶湧，前來查問。「好消息呀腦細！少膽虫手記好受歡迎，啲讀者特登用Logo個手勢向腦細你致敬呀！」淫賤黎笑到合唔埋嘴，少膽虫又可以蒙混過關。
