鄧穎珊之前做過空姐，話呢份工好唔簡單。
佳能香港副總裁Mingo鄧慶治囝囝Chandler鄧振豪開設嘅人氣拉麵店，其中環分店喬遷擴充，尋日請晒一班老友嚟盡情食麵。人群中有位嬌滴滴嘅靚女好勤力咁招呼客人，執枱、斟水一腳踢，原來佢係Mingo大女Ariel鄧穎珊。Ariel曾經喺國泰做空姐，尋日同前「國泰一姐」中華電力企業發展總裁Quince莊偉茵初相識，二人曾經係同事，Quince直言有相逢恨晚嘅感覺。
黃楚權（左起）同莊偉茵嘅細仔黃梓穎好高大，仲高過爸爸。
唐郭妤淺（左）同愛女嘉慧一碗麵兩份食，淺嘗即止。
Ariel早年喺澳洲修讀公關及廣告碩士，百足咁多爪嘅佢，曾經喺滙豐銀行工作，又喺國泰做過空姐，依家擔任麵店行政總裁，同細佬拍住上。Quince同老公黃楚權及十七歲嘅細仔黃梓穎都嚟湊熱鬧，Quince一見Ariel即笑言「相逢恨晚」，話若果當年知道佢喺國泰做，一定唔會放佢走喎，但Quince自己都已經唔係國泰人啦！Ariel就話做空姐唔只要識捧餐，仲要識急救，唔係想像中咁簡單。
前政務司司長唐英年同太太郭妤淺及一對仔女亦有嚟食麵。由於地方細，佢哋一家人分開坐，細女嘉慧跟媽咪，囝囝嘉盛就跟爸爸，唐太同嘉慧一碗麵兩份分，一隻雞蛋兩份食，Sweet到暈。快勞夾大王杜振源因為有事嚟唔到，派咗太太嚟，杜太仲帶咗兩支靚紅酒嚟同大家分享。食麵送紅酒，都幾特別喎！
第一手消息請下載on.cc東方互動
