政壇：搞搞政：波波運程弱 出年繼續黑

波波最近頭頭碰着黑，先被指涉嫌喺新界東北發展計劃有利益衝突，其後該局政治助理何建宗又被揭冇申報家族位於東北發展區嘅資產，接着波波尋日放假揸車時，仲喺跑馬地撞車，傷及頸部添。究竟佢係因近排發生嘅事情搞到心緒不寧，定黑開有條路呢？

堪輿學家麥玲玲就話車公廟嘅籤文已暗示官場今年好多事都唔太順利。至於波波嘅運程，麥玲玲話佢今年好弱，因為佢出生同天干相合、地支刑剋，所以佢嘅決斷力會差，思路亦唔清晰，直至明年都唔太掂咁話。我哋翻查內地預測運情嘅網站亦都話，一九五五年出生屬羊嘅人士今年牛年運程最終會同夥伴因意見分歧，不歡而散，仲會發生交通意外，真係大吉利是囉！

原來何建宗踏入四十至四十二歲呢個階段，正面對人生一個關口，會有大轉變。麥玲玲話從相學嚟講，呢個階段正行到鼻樑位置，十個鼻樑，九個唔靚，所以呢個年紀最易出事。而因涉商品交易所事件而辭退行會成員嘅張震遠就因合走官星，行緊倒官運，所以流年運滯咁話。