政壇：曾德成睇展覽少理爛地
曾德成喺網上撰文，推介北京798藝術區嘅一個展覽。（資料圖片）
香港大球場爛地風波淪為國際大笑話，但民政事務局局長曾德成道歉後懶理事件，當正唔關自己事咁將個波推畀康文署署長馮程淑儀。尋日德成局長仲有閒情逸致喺網上撰文，推介北京798藝術區當中一個舉行中嘅展覽，話個展覽雲集十幾位本港同內地藝術家，值得一睇。局長與其有時間千里迢迢去北京睇展覽，不如落大球場睇下塊草地善後工作搞成點，相信一定有助佢提升民望。
曾德成喺網上撰文，推介北京798藝術區嘅一個展覽。（資料圖片）
798藝術區位處北京朝陽區，係一個由廠房轉變為畫廊、設計室嘅藝術集中地，亦係唔少旅客嘅必到之地。德成局長話，近年唔少香港藝術工作者返內地進行創作，兩地文化藝術交流愈趨頻密，所以特區政府駐京辦同中華文化聯誼會近日就舉辦咗一個名為「英雄‧本色」嘅展覽，邀請十幾位五十後到八十後藝術家，利用雕塑、圖片、平面設計等藝術形式演繹對電影《英雄本色》嘅感受，展期直至本月十一日。
