政壇：外訪當放假吳得掂爆
吳克儉「外訪當放假」，認真羞家。
林慧思老師爆粗罵警一事全城哄動，教育局局長吳克儉尋日出席公開活動後主動開腔解畫，點知講錯嘢，「外訪當放假」，衰收尾爆收場。
吳克儉「外訪當放假」，認真羞家。
吳局長一個箭步走到傳媒採訪區，更搶閘主動提起林老師事件。眼見佢全程應對如流，又振振有辭，仲大講「生命影響生命」嘅至理真言，明顯有備而來。原來佢手持講稿，難怪信心十足啦！原本整個「扑咪」過程都喺佢掌握之中，點知一個突如其來嘅問題就將佢技術性擊倒。
話說有記者問到當局有冇就今次事件收到投訴時，可能冷不防記者一問，吳局長衝口而出就話：「我啱啱放完假，需要時間去了解下。」咦！放完假？乜佢唔係前日先啱啱結束新加坡同墨爾本嘅外訪考察行程返嚟咩，點解會變咗放假咁弔詭？事後新聞秘書幫佢補鑊，澄清話局長啱啱係外訪返嚟至真。唉！外訪同放假都搞唔清，認真「唔得掂」。佢尋日仲語重心長咁勸勉各老師要關注言行，以迎合社會嘅期望，睇嚟佢都要識做嘞！
