政壇：鬍鬚曾辣招碰壁賴立會
設計圖片及對白
政府為壓抑樓市炒風而推出嘅印花稅辣招引起全城爭議，財爺鬍鬚曾不下一次催促立法會盡快通過相關法案，但立會相關嘅法案委員會開足十幾次會都未完成審議，唔知係咪因為不得要領，鬍鬚曾尋日喺網誌再出招，呢招叫「賴」。
設計圖片及對白
鬍鬚曾尋日喺網誌撰文，一開波就批評部分議員五月企圖以「拉布」方式阻撓立會通過財政預算案。佢話喺過去立法年度入面，最令佢難忘嘅就係立會大會用足六星期一百三十三小時，先可以通過《撥款條例草案》。佢話今次「拉布」令市民、政府同立法會成為三個「輸家」，無人得益，仲話希望議員日後唔好再強人所難，要求政府本末倒置咁用財政預算案推動一啲未有社會共識、配套未成熟嘅建議。
守財奴唔讓步
跟住佢就為「辣招」解畫，話政府分別喺舊年十月同今年二月推出「買家印花稅」、加強「特別印花稅」同「雙倍印花稅」等三項樓市需求管理措施法案，並向立會建議喺日後通過相關法案時，將生效日期追溯至政府公布措施嘅翌日。但直至立法會休會前，相關法案委員會仲未開始對草案條文進行詳細審議之餘，仲通過無約束力動議，要求政府撤回「雙倍印花稅」法案。
鬍鬚曾強調，喺相關法案獲立會通過前，政府仍然冇法定權力收取額外印花稅，只能記錄相關交易，要等立會通過法案後先至追收有關款項，擔心如果立會再唔通過呢三項法案，樓市就會再次出現非理性亢奮，亦都會令市民唔相信立會想壓抑樓市喎！
嘩！議員就預算案「拉布」係想政府推行全民退休保障，都係因為鬍鬚曾做「守財奴」鎖住夾萬唔肯讓步，自己唔好好反省，依家仲想「四両撥千斤」轉移視線賴立會唔肯為辣招開綠燈添！點解佢唔攞多啲理據出嚟游說班議員支持法案呢，除咗剩係識賴人之外，擺明係佢懶喇！
