SUN搞作：少膽虫手記：番梘的意義
「HI！老公豬！」少膽虫不理。「我叫番梘強呀！你知啦，我同你都係衰啲風化案啦……」少膽虫只想催眠自己，希望憑念力改變呢個殘酷嘅現實。番梘強掩嘴而笑：「哈哈！呢間房嚟緊呢幾個月都係得我同你，你仲怕咩醜喎。」少膽虫暗自垂淚，心諗又發噩夢，只盼呢個噩夢快啲醒。
「聽講你幫淫賤黎攬晒上身，真係好Man呀！」番梘強喺洗手盆拎起番梘：「我最鍾意真男人！」少膽虫偷瞄一下番梘，生怕佢唧落地下，一切就無可挽回。「你做壹淫媒咁耐，我睇足咁耐o架！唔係睇壞腦，邊會喺度同你一齊坐？」番梘強將番梘放在掌心，用手指準備向地上輕推。「點啫？執咗佢啦！」
「夠啦！強梘番……呀唔係，番梘強先啱！」少膽虫怒不可遏，成個彈起。「我做壹全霉咁耐，呢啲肥皂劇呀、新聞性工作呀，全部都見慣做慣啦！個淫賤黎要我食死貓，你又叫我執番梘，少膽虫家陣話你聽：唔撈呀！」
番梘強呆一呆，輕輕話：「腦腫，你無事呀？我叫你執咗《爛果》同《喪報》佢咋！」「吓？咁你拎住番梘做乜？」「無，我驚我頂你個位，手腳會唔乾淨，捽多啲番梘啫！」少膽虫奇道：「頂我個位？真係發緊夢！」番梘強一面狐疑：「你唔知淫賤黎搵我頂你，叫我坐入你房咩？」直到呢刻先知，原來唔係尋日咁樣發噩夢。少膽虫呆望住舊番梘，望唔透呢個壹全霉，同監倉有咩分別。
