Sun奇古怪：Sun潮語：搬龍門

早前一場由盛事基金出公帑資助嘅足球表演賽，由上季英超冠軍對本地勁旅。結果香港當然係輸咗，但唔係講緊輸波，係講緊呢場波香港連面子同聲譽都輸到七個一皮，衰到貼地。呢件盛事之所以會變成國際醜事，就係因為特衰政府施政不善，康文署管理不當，放任香港大球場草地變爛地，搞到英超球會揚言罷踢。如果真係可以「搬龍門」，寧願場波搬去粉嶺高爾夫球場踢，起碼嗰度長年綠草如茵。不過嗰度係本地權貴嘅私人會所，對於好似你同我呢啲無錢無面嘅升斗市民，唔好話要「搬龍門」，甚至想搵兩個似樣嘅龍門踢場衞生波都幾難。

情況就好似踢波咁，明明射唔入，都可以亂搬龍門嚟就個波，係唔係都係你贏晒，無得輸。「搬龍門」呢個潮語最近經常喺報章上睇到，因為自特衰政府換屆後，道德標準、政府操守、施政水準日日要「搬龍門」，嚟迎合極低質素嘅管治班子。簡單啲嚟講，其實咁渣嘅波，好似陳茂波咁屎波，就算個龍門任你點搬，結果都係會輸。

足球始終係鬼佬嘢，「搬龍門」呢句潮語，其實係嚟自英諺「Moving the Goalposts」，直譯就係「搬龍門柱」，係八十年代開始喺英美地區開始流行嘅諺語。香港有啲專係鍾意直譯英諺嘅高等華人，近年開始用「搬龍門」呢個潮語。就以最近喺西洋菜街、見義勇為怒斥「愛字堆」同質疑警方濫權嘅林慧思老師為例，兩個警察工會出晒聲明，對有警員被粗口辱罵感到遺憾。但當自己被投訴有警員用粗口辱罵市民嘅時候，又叫香港人包容，呢啲咪正宗「搬龍門」囉……差人大晒！