政壇：泛民趁公帑外訪賺到盡
立法會扶貧小組委員會本月下旬去台灣同日本考察十日，就扶貧政策同當地政府、學者及非牟利機構交流。叫得外訪，機票酒店就梗係公帑找數啦。一班經常站喺道德高地嘅泛民議員就賺到盡，借外訪之便順道觀光兼探朋友，其中馮檢基（阿基）同張國柱（阿柱）就要黃毓民呢位台灣女婿做導遊，帶佢哋遊覽曾經係軍事禁區嘅金門，而長毛梁國雄更加喺日本逗留多五日添！
扶貧小組委員會八名成員將聯同議員黃國健、謝偉俊喺本月二十至二十九號出訪台北同東京。有公帑資助，六個泛民議員除咗梁家傑外，個個唔係提早出發，就係延遲返港。毓民同我哋講，佢原本打算二十號先跟大隊過台灣，但今次考察團團長阿基同阿柱知道佢去過金門後，就話好想去觀光，仲搵佢做導遊添！所以佢就同阿基同阿柱提早三日過台灣，據聞阿基仲打算抽時間去高雄一趟，真係賺到盡、唔好嘥。
議員梁耀忠就提早三日去台北，結束外訪後喺東京留多一日，仲話：「橫掂機票錢都一樣！」至於長毛亦會喺結束訪問行程後喺日本留多五日，佢打算趁機會去埋大阪同京都，探吓朋友咁話。班泛民議員批評人哋延後利益就叻，輪到自己就當萬千選民無到，家吓究竟係持雙重標準定係寬己嚴人呢？
