政壇：宮崎駿如秋官專隊冧股市
藝人鄭少秋一有劇集播映，本港股市就會受「秋官效應」下跌一輪，幾乎萬試萬靈，估唔到日本都有相同情況，而影響市場嘅就係動畫大師宮崎駿。話說港人熟悉嘅吉卜力工作室有一系列動畫電影如《千與千尋》、《龍貓》等，日本NTV電視台每隔一排就會喺星期五晚嘅黃金時段播放，如撞正美國公布就業數據，就會引發日圓上升及股市下跌，當地市場稱之為「吉卜力效應」。
尋晚電視台又播《天空之城》，咁啱美國公布非農業職位數據。回顧過去九次同樣情況，八次數據都未如理想，當中七次更有不利股民嘅市場波動。
以一一年七月為例，日本重播《魔女宅急便》，期間美國公布嘅數據差強人意，導致美元兌日圓急跌1.2%，隔周一日股亦下挫0.7%。
據「吉卜力效應」信徒所講，NTV自一○年一月以來播放咗二十四次宮崎駿動畫，之後嘅日本交易時段圓匯上升比例達四分之三，日股亦有近半機會下跌。唔少日本散戶都對呢個效應「寧可信其有」，有即日鮮炒家仲話，佢幾年前喺電視台重播《天空之城》前平倉，結果成功避過美日股市大跌一劫。
