政壇：林國誠偷閒幫襯擦鞋匠
林國誠幫襯完擦鞋匠，即趕返公司搏殺。
早幾年政府想趕絕喺中環街邊搵食嘅擦鞋匠，但社會各界出聲力撐，名人亦爭相幫襯支持，令呢個香港特色得以保留。早幾日下午大約兩點鐘，電訊界「營銷鬼才」香港電訊高層林國誠（Bruce）就趁食晏後幫襯戲院里擦鞋匠，八分鐘加上三十元，對鞋即刻立立令。
林國誠幫襯完擦鞋匠，即趕返公司搏殺。
Bruce呢日由皇后大道中行到戲院里，但佢幫襯開嗰檔有客人，佢耐心輪候大約五分鐘都未得，惟有幫襯隔籬嗰檔。擦完鞋後，佢快步行到中建大廈前嘅的士站，打算上車離去，問佢趕住去邊？佢就話啱啱同客戶食完晏，要趕返公司搏殺。Bruce原本係國際手提電話品牌嘅港澳區掌舵人，年前跳槽到香港電訊出任無線業務巿場營銷總裁，繼續發揮銷售天分。
曾經參加過「窮富商大作戰」嘅Bruce，試過幾日露宿者生活，講起當年喺聖誕節露宿街頭，Bruce仍然記憶猶新，佢話嗰年聖誕係歷史少見嘅寒冬，所以瞓街真係好辛苦，電視最終播出嘅只係三分之一，仲有更多艱苦實況冇播出街喎！
