設計圖片及對白

香港大球場草地變爛地事件鬧出國際大笑話,有英超領隊更形容大球場係「殺人球場」,搞到負責管理嘅康文署丟晒架、民政事務局局長曾德成仲要道歉添!社會上要求重鋪草地嘅呼聲此起彼落,闊別甲組三十三年嘅元朗足球隊主席王威信尋日舉腳贊成,仲爆料話外國球場唔會好似香港大球場咁,不時舉行佈道會、步操等活動,似乎暗示踩得多自然踩爛晒啲草地。咦?制服團體、宗教活動都歸德成局長管噃,咁大球場之禍算唔算德成局長自作孽呢?

設計圖片及對白

康署一味賴雨水多

大球場搞到香港出醜,德成局長本周一急急腳去視察,仲為大球場草地變爛地一事「補鑊」致歉,佢尋日出席公開場合活動,未有再開腔講大球場嘅跟進,但同場出席活動嘅王威信就以球隊主席身份大談球場草地管理。

王威信話,依家好多活動或比賽已預定咗喺大球場舉行,大球場亦唔似外國球隊嘅專用球場咁,只作球賽之用,加上大球場去水系統麻麻,今次又喺數日內連續進行多場比賽,草地情況咪咁囉!佢認同呢個係好時機去重鋪大球場草地,但估計重鋪工作最快要去到明年五、六月先可以成事,因為好多團體一早已預訂大球場舉行活動。

講講吓,佢用元朗大球場嘅草地管理作分享,佢話元朗大球場去水情況同樣麻麻,所以佢哋特別將球場嘅草養長啲,等進行球賽時個波唔會咁彈。王威信知道元朗大球場面對乜問題而對症下藥,相反負責大球場管理嘅康文署一味賴天氣惡劣雨水多,唔通呢啲就係外行同內行嘅分別?

第一手消息請下載on.cc東方互動iPhone/iPad/Android/Windows Phone Apps