林健鋒話喺香港搞一級方程式大賽車有難度。(資料圖片)

香港係盛事之都,唔少人都希望香港效法新加坡,申辦一級方程式大賽車(F1),認為以香港夜景街道作跑道,一定好有特色。盛事基金主席林健鋒透露,香港唔係冇得搞F1,只係香港街道有好多坑渠蓋,係一個令F1難成事嘅因素。

林健鋒話喺香港搞一級方程式大賽車有難度。(資料圖片)

佢話新加坡每年都搞F1,唔係封吓路就得,唔單止要重鋪賽車級馬路,仲要搵地方興建維修站,連馬路邊嘅坑渠蓋都要逐個逐個用燒焊鎖死,以免車速太快時「片」起啲坑渠蓋,危及車手同觀眾,比賽後又要解除坑渠焊接,等工程人員可以做到嘢。佢質疑香港有咁多坑渠蓋,到底有關部門肯唔肯配合呢?加上香港馬路彎多且窄,好可能只能舉辦三級方程式賽事,但咁做又會同隔籬澳門爭飯食,所以喺香港搞F1有一定難度囉!

今年政圈咁多是非,佢本來打算暑假去北海道札幌休閒一下,點知有「高人」叫佢咪去,因當地輻射指數上升咗少少,估計係吹北風關係,令福島輻射吹晒去北海道喎。至於呢個猜測係咪真確,真係要測量過至知。

第一手消息請下載on.cc東方互動iPhone/iPad/Android/Windows Phone Apps