城中鏡：陸志聰難忘獲贈口罩抗疫
提起抗疫點滴，陸志聰百般滋味在心頭。
十年前沙士嘅源頭病人去咗廣華醫院求醫，當時全港都未知乜嘢係沙士，醫院就好醒咁叫晒啲前線同事帶N95口罩，令廣華喺沙士首階段抗疫並無醫護人員受感染。當年嘅廣華醫院行政總監陸志聰，仲被醫管局調去淪陷嘅瑪嘉烈醫院幫手，陸智聰講番呢段時期都百般滋味。
提起抗疫點滴，陸志聰百般滋味在心頭。
話說當年同事知佢要過瑪嘉烈都好擔心，仲有同事叫佢入辦公室，送咗個最高規格既N100口罩畀佢。當年全港口罩都斷晒貨，呢個N100口罩係個同事託美國朋友買，本來用來自保嘅，無幾耐又有另一個同事私下送個P100口罩畀佢，令佢好感動。佢話最後兩個口罩都畀咗前線同事用，依家都後悔當年無留為紀念。
另一樣令佢無法忘懷嘅，係當時只有四歲嘅囝囝，喺佢返工前叫爸爸千祈唔好掂啲病人，因為會死o架！佢當時好想攬住個仔，嗰種感覺到依家仲記得。如今佢已升呢做港島西醫院聯網總監，但佢話廣華畀佢家嘅感覺，份人情味喺第二間醫院搵唔到喎。
