鄺美雲(右)搞心靈講座,仁愛堂前主席張心瑜(中)同「養心匯」副主任張芯瑜都去為心靈充電。

由城中一班專業婦女成立嘅「養心匯」日前號召姊妹們齊「養心」,副主任Cally鄺美雲帶頭滋養心靈,喺九龍灣香港佛光道場舉辦「心靈DNA」講座,佢不忘講吓佛偈,話幸福要靠自己爭取,開心與否,全靠改變心境。今次佢仲專程請來佛光山中港澳區總主持滿蓮法師分享快樂之道,一眾名人包括港島婦女聯合會主席張雅麗、眼科醫生周伯展伉儷等,都去為心靈充電。

鄺美雲(右)搞心靈講座,仁愛堂前主席張心瑜(中)同「養心匯」副主任張芯瑜都去為心靈充電。

滿蓮法師與在場嘉賓分享快樂之道。

懷孕四個月嘅張雅麗(左),不忘與譚羅筱瑩分享懷胎嘅喜悅。

講座開始前,茹素多年嘅Cally就為逾百賓客預備豐富齋菜,等大家清吓腸胃。做得咁投入,皆因佢心中有座右銘,就係「有緣 ,盡力而為;無緣,急流勇退」。佢話學會凡事唔強求,懂得感恩、放下,煩惱自然一掃而空。佢又坦言,人生並非一帆風順,但每次考驗來,都會視為一種磨練,唔會輕易被逆境打沉。

張芯瑜唔認得家鄉路

唔少人認為Cally生活富裕,大可印印腳歎世界,但佢堅持工作,下月將為公司品牌舉辦珠寶展,又去江西景德鎮拜會陶瓷大師,愈忙愈開心。身兼西安市政協嘅Amy張芯瑜就啱啱遊西安探親,佢家族喺當地有地產、金礦等,最近仲開埋幼稚園。佢笑言家鄉發展一日千里,每次返去變化到已唔認得路,此行大擦甜美西瓜及羊肉泡饃,仲恨不得空運返香港喎。

第一手消息請下載on.cc東方互動iPhone/iPad/Android/Windows Phone Apps