政壇：搞搞政：蔣麗芸反擊「抽水王」鬧泛民議員EQ低
設計圖片及對白
發展局局長「波波」陳茂波爆出利益衝突疑雲，立法會建制派見波波上任後風波一浪接一浪，都冇再積極護航，唯獨Ann蔣麗芸前日不惜喺立會以「發癲論」護波，搞到被「倒波」泛民主派議員范國威批評佢侮辱議員、違反《議事規則》。不過，阿Ann就冇有怕，仲反擊指范國威係公認嘅「抽水王」，又鬧啲泛民議員EQ（情緒智商）低，唔會收回言論咁話。
設計圖片及對白
阿Ann尋日喺電台節目解構自己日前喺立法會發展事務委員會嘅發癲論︰「我係話全世界反對派啲人都希望執政啲人落台，我係指立法會反對派啲人係咁。」佢見當日啲議員又掃枱、又拍門拍到癲晒，先至有感而發咁話。對於范國威嘅抨擊，阿Ann就一啲都唔畀面直指對方係立法會公認嘅「抽水王」，仲為波波平反話︰「我都被人話我發花癲啦，有乜唔妥？陳局長畀人『質』咗幾日，依家我係咁意話番一句，咁都受唔到，佢哋EQ唔夠啫！」
至於被阿Ann寸爆係抽水王嘅范國威，就堅持阿Ann嘅發癲論語帶冒犯，違反咗《議事規則》，十月立法會復會後會去信委員會主席劉皇發要求跟進喎！
