政壇：政府捉鬼嚴防洩密
美國中情局「走佬特工」斯諾登，早前引爆美國監控風波，「斯諾登」一詞就成為爆料嘅代名詞，同樣嘅爆料漏料風波亦喺斯諾登曾停留喺香港發生，事關接二連三有港府跨政策局嘅內部機密文件洩漏到敵陣，連多個委員會嘅人事任命都被事前張揚，港版斯諾登可謂無處不在。據聞有港府高層極為不滿，私下表明要徹查嚴重洩密事件，並揪出內鬼以儆效尤，呢場「捉鬼戰」一觸即發。
設計圖片及對白
行會機密文件漏出
特首梁振英（CY）領導嘅新政府上任年多，久唔久就有不利消息喺敵陣出現，最弊係最近半年連政府內部機密文件都漏咗畀敵陣，最近半年已有四單漏料事件發生，為敵陣提供彈藥打擊新政府。消息指首宗漏料事件係有人提早漏料洩露行政會議成員張志剛獲委任為教育資助委員會成員，搞到張志剛未上任就被人轟佢有意「染紅」教資會。
第二宗事件就係有人將各政策局收到日後制訂政策時要評估內地政府同民眾反應同觀感嘅文件漏畀傳媒，仲離譜到將機密文件圖文並茂刊登，擺明高調向CY政府示威。漏料事件接二連三發生，其後有人聲稱獲得行政會議文件，率先披露新界東北發展計劃嘅最新修訂，包括把坪輋、打鼓嶺發展改劃為新界北發展範圍，理應係高度機密嘅行會文件竟然落入敵陣手中，有行會成員私下表示冇見過呢份文件，難道有更高層次嘅人私下漏料？
及至最近最新受害嘅政策局就係民政事務局，有人洩露當局有意委任行會成員羅范椒芬做區議會薪津獨立委員會主席，連同多名「梁粉」獲推薦加入，儘管事後獲委任人選同有關漏料有出入，但有知情人士話有關名字早期確曾出現推薦名單之列，搞到港府內部極為震怒。
有政界中人形容，熟悉CY嘅人都知道佢本人最唔鍾意漏料，依家有政府版「斯諾登」明目張膽漏料畀敵陣，簡直就係明剃CY眼眉，難怪有港府高層曾私下表明要正視呢個問題，誓要揪出內鬼。不過，如果今次港府「捉鬼」只係雷聲大雨點小，睇怕只會繼續被內鬼出賣、繼續捱打喇。
