城中鏡：上海姑娘來港做胡琴一姐
張重雪自五歲起與胡琴結緣，終成為頂尖胡琴家。
近年香港中樂團致力培育生力軍，其中生於80後嘅胡琴家張重雪，日前獲中樂團委任為胡琴首席，將於今年九月履新。呢位年輕嘅上海姑娘，五歲起與胡琴為伍，七年前毅然來港加入中樂團，今年取得香港居民身份證嘅同時，喜獲晉升「胡琴一姐」，可謂「雙收」年。
張重雪自五歲起與胡琴結緣，終成為頂尖胡琴家。
中樂團成功研發環保物料代替蛇皮製造胡琴，音色穩定且更耐用。
張重雪（箭嘴示）榮升香港中樂團胡琴一姐，可喜可賀。
中樂團係舊年新增胡琴首席一職，並喺今年二月開始選拔，經過六項嚴格考核後，終由張重雪出任。能夠喺芸芸胡琴手中脫穎而出，張重雪坦言心情激動，自小每日練習胡琴五、六小時嘅佢，每隻手指頭都刻滿按壓琴弦留下嘅傷痕。雖然習琴犧牲咗玩樂時間，但佢認為以此換取驕人佳績，非常值得。
張重雪之所以與胡琴結緣，皆源自爺爺。佢憶述爺爺愛聽京胡，嫲嫲則在旁哼唱京劇，爸爸喺耳濡目染下亦愛上。張重雪五歲時首度與胡琴邂逅，欣賞由兩條弦線發出嘅純淨琴音，深感妙不可言，從此深深愛上。現時佢喺香港教育學院及演藝學院兼任二胡導師，積極推動胡琴文化，學員由五歲到八十歲都有，仲有粉絲群組添！
張重雪話就任後首要任務，係推廣環保胡琴。據了解，傳統胡琴一向以蛇皮為材料，但蛇皮會因空氣濕度影響音色穩定性，亦縮短胡琴壽命。又因美國、澳洲、日本等國嚴禁蛇皮入境，令胡琴未能順利於世界各地登場。中樂團早年獨家研發出環保胡琴，以可分解循環再造嘅環保物料PET聚脂薄膜取代蛇皮，為胡琴界帶來喜訊。張重雪預告，上任後頭炮係十月帶樂團到俄羅斯演奏，遲啲仲會灌錄個人音樂專輯。
