政壇：搞搞政：建制派錫身唔肯救波波
設計圖片及對白
發展局局長「波波」陳茂波爆出利益衝突疑雲後，肯撐佢嘅立法會議員一隻手數得晒，究竟點解？綜合多位政界人士分析，今次波波出事後即時出嚟澄清，本來係好對策，但點知再被傳媒引爆第二個炸彈，而佢仍係好被動咁交代情況，問一句講一句。有人形容波波被傳媒一輪轟炸後，好似坐喺隻爛船上面，水底仲有無其他魚雷會被引爆，得佢自己至知。試問咁危險嘅情況，一班坐喺豪華郵輪上嘅錫身建制派，又點會向爛船上嘅波波伸出援手，你估佢哋唔驚跟船太貼齊齊被炸咩？
設計圖片及對白
所以到目前為止，都係得「橄欖」陳鑑林、Ann蔣麗芸同保險界陳健波肯去救災，其他建制派表面冇出聲，實質老早叫船長將隻「建制郵輪」駛得咁遠得咁遠，寧願用望遠鏡觀察，等波波隻船爆得一乾二淨，屆時隻船如果仲未沉先幫手，反之就叫波波棄船好過。
因果循環必有報，議會再冇人肯同波波坐一條船，事必有因。其中一個主因就係波波當年做議員時太獨行獨斷，同其他建制派牙齒印太深，好似當年佢做議員個人利益監察委員會，多位議員就被佢親手「煮」過，好聽啲就叫公正嚴明，但班建制派眼中，當然覺得佢唔識撈。
