政壇：阿涂「辦公」兼享閱讀樂
阿涂愛帶故事書入廁所。
宣明會尋日搞舊書義賣，籌款幫內地一間學校興建新教學樓，同場請咗立法會議員陳婉嫻同涂謹申每人即場捐一本書支持活動。嫻姐揀咗翻譯作品《再給我一天》義賣，本書講一個職業棒球手經歷創傷後厭世自殺，瀕臨死亡邊緣反思自己以前唔生性，無好好同阿媽相處。嫻姐講講吓本書，都不禁嘆咗句「樹欲靜而風不息，子欲養而親不在」。
阿涂愛帶故事書入廁所。
阿涂亦係台上分享佢嘅「紓程」故事，但指嘅並唔係抒發情感，而係紓緩如廁過程。佢自爆屋企廁所入面放咗幾本短篇故事書，「辦公」時可以轉移專注力，減低身體緊張，口口聲聲話「開大」時睇書可以帶畀佢快樂時光，令過程更快過。而佢捐嗰本書叫做《與38顆善心齊飛》，講述三十八個航空公司職員到世界各地做義工嘅經歷。佢話本書其中一篇講有個空姐將做義工影嘅相帶上飛機，連同「零錢布施」捐款信封一併畀乘客睇，大讚做法醒目，為「零錢布施」添加「附加值」。阿涂強調，佢捐嗰本書無帶過入廁所，叫市民唔使咁擔心喎！
