政壇：保良局拜關二哥有段古
保良局主席鄭錦鐘負責帶領關二哥寶誕祭祀儀式。
關帝係三國時代武將，其忠義形象深入民心，不但廣受執法人員同江湖人士尊崇，就連慈善機構亦奉佢為守護神。尋日保良局就為關二哥寶誕舉行祭祀典禮，而負責帶領祭祀儀式嘅Eric鄭錦鐘主席，事前就做足功課，話要考究一下保良局拜關帝嘅由來。
保良局主席鄭錦鐘負責帶領關二哥寶誕祭祀儀式。
四太希望囝囝猷君做暑期工吸收社會經驗。
Eric話留意到香港六大慈善組織之中，只得保良局奉祀關帝。於是佢喺求知欲驅使下，走入保良局博物館翻查歷史資料。原來百多年前保良局創立之初，係屬於保護婦孺嘅民間執法機構，不但有權審理拐帶案件，當年嘅主席或總理只需懷疑有人遭無理拘禁，仲可以帶頭破門入屋！而關二哥嘅忠勇精神，恰好就係匡扶弱小嘅象徵，理所當然成為保良局奉祀對象。後來隨着香港嘅保安力量日趨完備，保良局嘅職能亦轉為專注貧苦老弱嘅福利事宜。然而拜關帝嘅傳統，仍然延續至今。
至於有份出席祭祀典禮嘅副主席梁安琪，今年囝囝何猷君面臨升學抉擇，但佢就認為囝囝無論到邊間院校就讀，都應趁暑假做暑期工以吸收社會經驗，最理想，就梗係到保良局做義工喇。
