政壇：馬逢國睇見大球場眼冤
設計圖片及對白
香港今個星期初邀請咗英超班霸「紅魔鬼」曼聯來港上演足球友誼賽，但香港大球場草坪喺賽前經過幾場大雨洗禮，竟變成爛地，淪為國際笑話。足球總會、體育界紛紛鬧爆政府冇好好管理球場，負責嘅民政事務局局長曾德成同康文署署長馮程淑儀亦連番為事件致歉。搞到滿城風雨，但偏偏唔見代表業界嘅立法會體育、演藝、文化及出版界議員馬逢國。
設計圖片及對白
馬逢國尋日就以立法會民政事務委員會主席身份去信德成局長，要求德成局長盡快交代大球場嘅維修工作，以釋公眾疑慮。隨後佢回應我哋嘅查詢，原來過去兩個星期佢身處英國，而喺傑志大戰曼聯時，佢仲身處曼聯嘅主場添！
斥康文署設施落伍
咁有乜嘢感受呢？佢就話曼聯主場片草地真係好靚，尤其佢哋啱啱換過草，對比更加強烈，兩地同樣落過幾場大雨，但曼聯主場依然綠草如茵，令人羨慕，而香港大球場嗰塊就令人汗顏咁話。但係點解唔出句聲呀？佢好灰咁話都唔知點講喇！咁又難怪嘅，事關曼聯主場同香港爛球場簡直係天堂與地獄，認真諷刺，叫佢點講吖？
馬逢國又話，其實業界就香港大球場草坪問題已經講過好多次，佢亦提過好多次康文署設施落伍，例如紅磡體育館設施不足，羽毛球比賽時要重新鋪過地板，音樂會嘅音響器材又落後等等，但一直未得到有關部門跟進。佢仲話英國球場每十年換一次草，好似今次曼聯主場咁，換草用咗一百萬英鎊，即約一千二百萬港元，但香港大球場十多年未換過草，相信若要換草嘅話，一定會平過英國喎！德成局長，聽到未呀？
