消防天眼周街影 侵犯私隱說不清
古人有云，天網恢恢，疏而不漏。依家可以加多一句，天眼恢恢，疏而不漏。事關攝錄鏡頭無處不在，可以話梗有一個喺左近，市民一舉一動都無所遁形，就算避得過大街小巷嘅固定天眼，亦避唔過消防車同救護車嘅流動天眼，你話今時今日嘅香港仲有乜私隱可言吖。
港產官僚成日話要保障市民私隱，其實純屬大隻講。呢，本報去年底踢爆消防處計劃喺部分消防車同救護車加裝天眼，被批侵犯市民私隱，引起輿論嘩然，令計劃一度叫停，點知消防處擇惡固執，竟然靜靜雞試行計劃，仲話長遠會喺近千架消防車同救護車安裝合共四千幾個鏡頭添。天眼無處不在，消防車周街走變周街影，市民乜私隱都冇晒啦，唔嬲就假！
最離譜嘅係，消防處擘大眼講大話，聲稱咁做係為咗「協助調查交通意外」，並徵詢過私隱專員公署同律政司意見喎。事實又係點呢？私隱公署踢爆，消防處從來無諮詢過該署意見；而律政司就表示，雖然計劃無違法，但推行前應該公布詳情同進行公眾諮詢。
聽到未呀，消防處既冇公布詳情，又冇進行公眾諮詢，就鬼鬼祟祟安裝天眼，即係當公眾利益冇到啫，咁同擺明侵犯私隱有乜分別呢？
再講喇，政府部門各有分工，各司其職，調查交通意外一向由警方負責，根本唔使依賴呢類錄像，消防處多管閒事撈過界，肆意侵犯市民私隱，究竟有乜目的，真係令人懷疑。消防官僚不務正業，消災防火嘅本分做唔好，搞到危機四伏，火災頻頻，但講到打壓新聞自由、侵犯市民私隱咯喎，佢哋就零舍精神，唔怪得有人話消防處變咗現代東廠，真係一啲都冇講錯o架。
嗱，公道自在人心，消防處倒行逆施，連救護員工會都幫理不幫親，批評消防處無清楚向市民交代計劃，百分百侵犯病人及前線人員私隱，無任何實際意義。佢哋仲質疑，新措施純粹為咗監察同事，為前線人員添煩添亂。而人權組織亦炮轟，消防處侵犯私隱理據唔充分，應該事前作公開諮詢，絕對唔應該自把自為。
正所謂，眾怒難犯。基本人權不容踐踏，市民私隱不容侵犯，消防處再唔取消偷窺計劃，盞唔衰攞嚟衰嘅咋。計太一叮話齋，如果消防處一定要裝天眼，只要裝一隻就夠啦，用來（目及）實處長陳楚鑫，睇下佢點樣不顧形象當街煲煙，點樣知法犯法亂過馬路，咁仲實際喇，叮！
