城中鏡：攝影大師楊紹明好「營」
同行女士拎起檸檬聞吓，身邊嘅楊紹明亦畀咗啲意見。
香港回歸後，前國家主席楊尚昆嘅兒子、攝影大師楊紹明經常來港，亦不時接受本港傳媒訪問，但近年佢已好少喺香江公開現身。點知咁啱喺上星期五晚上大約七點幾鐘，就見到佢現身中環ifc商場行超市，同行仲有一名中年女子同兩位打扮輕便嘅後生仔添！
同行女士拎起檸檬聞吓，身邊嘅楊紹明亦畀咗啲意見。
楊紹明被蛋糕吸引住，企喺櫃位前仔細研究。
楊紹明（前左）與同行女士好好傾，兩名年輕人就緊隨其後。
當晚楊紹明一行四人喺超市閒逛，神態輕鬆似足一家人。佢哋睇嚟好注重養生，專攻蔬果櫃位。期間同行嘅女士仲拎起個檸檬聞吓，楊紹明同佢有傾有講，似乎畀咗啲意見，但最後都係冇買到。跟住佢哋又睇中鮮美嘅番茄，最後拎住包青瓜同番茄到收銀處畀錢。臨離去前，楊紹明被雪櫃內五顏六色嘅蛋糕吸引，但諗咗一陣都係冇買，一行人施施然離開。
楊紹明十二歲時，獲父親楊尚昆送贈一部相機，自此佢就愛上攝影。後來佢加入內地通訊社做攝影記者，國家領導人成為佢鏡頭下嘅最佳模特兒，其中做鄧小平「御用攝影師」十二年，成為佢響噹噹嘅代表作。數數吓，佢今年已有七十一歲，但真人望落仍然好後生，唔通鍾意影相都會令人變年輕？
