政壇：顧明均前海地皮價飛升

話說喺美國上市嘅南太集團，二十幾年前已喺深圳開廠，勢估唔到同廠房距離十分鐘車程嘅前海，將打造為金融區，同上海鬥過。

顧明均間廠雖然好新淨，但既然中央要呢區「騰籠換鳥」，誓要將雀籠啲鳥換過晒，只容納具標誌性嘅物業，鄰近嘅107國道又禁大車使用，間廠唔搬都唔得，原廠地「被迫」重建，起靚好多嘅商用物業囉！

嘩！咁樣一計，塊地咪身價飛升？顧明均話以六倍容積比計，可建樓面面積達到三十萬方米，以及估計四年後每平方米值三萬蚊人仔（下同），成個項目就值九十億，扣除三十億元建築費，仲唔係冷手執個熱煎堆？再加埋上星期前海第一次賣地，就出現天價，益晒附近地皮，唔怪得南太喺美國嘅股價連續兩日大升，睇嚟美國嘅投資者識得搵前海概念股。

未來咁多Project，顧明均就嚟七十歲，會唔會退休都未完成晒，佢話冇咁快退休，因為有兩單官司纏身，但佢笑笑口話打慣官司，咁多年大大小小官司都有五十單。咦！咁佢大有資格開班授徒，教人點樣打官司。