政壇：議員睇波 不忘鬧爆政府
陳克勤邊睇波邊鬧爆康文署管理不善。
曼聯同傑志前晚嘅球賽，因香港大球場草地變爛地而鬧出國際笑話，搞到親身入場觀賽嘅多名立法會議員忍唔住鬧爆康文署管理不善，有人更寸爆要康文署管理場地，等於希望兼職奶媽做得好過親生阿媽。只可惜作為親生阿媽嘅民政事務局局長曾德成一直闊佬懶理，旨意晒康文署呢個奶媽，有乜辦法唔搞到大球場出「風瘌」吖！
陳克勤邊睇波邊鬧爆康文署管理不善。
林凱章建議政府興建多一個國際級足球場做後備。
入場睇波嘅立法會足球隊隊長陳克勤，本來咬雞髀、玩人浪好開心，但講到大球場爛地就一把火，直言要好好檢討避免同類事件再發生。曾到英國睇賽事嘅資訊科技界議員莫乃光亦擔心，「爛地」令球員落場不落力，令到入場球迷無癮喎！商界議員林健鋒個仔林凱章更建議，政府應覓地興建多一個國際級足球場，以便應付突發情況發生。
但最應該負責嘅德成局長當晚縮埋睇波，全程以「你睇我唔到」嘅姿態避開球迷視線，反而主持開球禮同頒獎嘅商務及經濟發展局局長蘇錦樑，每逢出場就被在場人士噓爆，名副其實係「黑狗偷食，白狗當災」。
