設計圖片及對白

向來好激嘅人民力量，自從首位女主席Erica袁彌明上任後，畀人嘅印象係當堂軟化晒。Erica尋日出席電台節目時話，人力以往嘅政治論述被激進形象蓋過，未來日子佢哋會多啲強調自己嘅政治論述，仲會同政府協商喎！但人力最識得政治論述嗰位都退咗黨，而且就算佢哋班領導唔激，走喺台前嘅同下面嗰班若要公民抗命，其他人都未必控制到啦！Erica想人力轉型，似乎有啲難度喎！

設計圖片及對白

寸白鴿青黃不接

其實政界一直有傳話唔知人力係咪想逐漸走向溫和派，自從Erica接棒後，呢個傳言更甚囂塵上。Erica尋日出席電台節目，真係講到好似要脫離激進路線咁，仲話佢哋以往嘅政治論述被激進形象蓋過，當大家講起人力，第一印象就係「好激」。佢話依家係時候將政治論述講出嚟，相信支持者唔會比白鴿黨同公文袋少咁話。

被問到有冇了解過點解香港嘅激進派別會發展得咁快呢？Erica就話一方面可能係政府無用，另一方面就係溫和派嘅泛民路線唔work，起唔到乜嘢功效。所以佢哋以後除咗喺議會入面用肢體語言繼續抗爭，仲會喺議會外做和平、非暴力嘅公民抗命，因為如果要用暴力嘅話，一定唔夠解放軍鬥。

雖然Erica講到要脫離激進路線，但又不屑做白鴿黨嗰種泛民主派，就算尋日講到白鴿黨，佢都話白鴿青黃不接，應該要反省。另一方面話要和平、非暴力咁抗爭，但又成日都同社民連等激進派走得咁貼，對政改方案嘅睇法又相似。加上人力班阿頭話要和平，下面參與抗爭嘅師兄弟又係咪有同樣睇法呢？淨係睇立法會裏面嘅成員「大舊」陳偉業同「慢必」陳志全就知有幾難。想唔走激進路線，問過大舊未呢？

第一手消息請下載on.cc東方互動iPhone/iPad/Android/Windows Phone Apps