幾年前有一部戲叫《天水圍的夜與霧》,改編自一宗真人真事嘅滅門倫常慘劇,當時引起好大回響。諗唔到過咗咁多年,家庭暴力問題愈演愈烈,唔止黑夜無結束,慘霧仲不斷擴散添,筲箕灣愛東邨三屍血案震驚全港,令人再次關注家暴受害者嘅人身安全。

全港有多少婦孺活喺家暴陰影之下呢?太一叮睇完警方嘅數字,真係唔知應該放心定應該擔心。根據警方資料喎,家庭暴力刑事案件年年下跌,由○七年二千五百零五宗跌至上年二千零二宗,你話有乜可能吖?

婦女團體踢爆,○九年開始,警方只會將含刑事成分嘅案件列作家暴刑事案件,其他一律列作「家庭事件」處理。哦,咁就唔怪得家暴罪案減少咯,原來官老爺玩緊語言偽術。喂,好多倫常命案都係躁夫狠母一時衝動造成,唔一定要有虐待前科先至有資格成為潛在兇手o架,市民報警求助,拍門求救,警方若無其事,拒施援手,等於助紂為虐,唔怪得家暴血案愈來愈多,愈來愈慘啦。

案件係咪被列作家暴性質,唔止名稱有別咁簡單,仲係決定案件會唔會轉介社署跟進。官老爺為求製造家暴問題得到改善嘅假象,置受害人安危於不顧,簡直就係幫兇!

嗱,如果警方係家暴血案嘅第一幫兇,咁社署就係第二幫兇嘞。即係咁,家暴受害人飽受身心摧殘,最快逃離魔掌嘅方法就係暫時搬離傷心地,社署接到求助個案,唔係義不容辭搵地方安置佢哋,而係要佢哋先貼錢租房,你話係咪冷血?

叮佢個鎯鎯,社署係咪腦殘呀?萬一家暴受虐人無錢租劏房,咁咪要被迫重投魔掌?港產官僚咪以為兩公婆打交係耍花槍,床頭打交床尾和,好多人就係咁無咗條命。如果社署官僚真係腦殘唔記得,等太一叮提醒佢哋,當年天水圍滅門慘劇嘅受害人本來已經搬出住所,就係被規勸返去躁夫身邊,結果與一對孖女命喪屠刀之下。港產官僚見到棺材都唔流眼淚,係咪人嚟o架!

俄國大文豪托爾斯泰講過,幸福嘅家庭都係相似嘅,而不幸嘅家庭各有各嘅不幸。本港家暴受害者面對住嘅其中一個不幸,就係港產官僚麻木不仁。家暴案件愈演愈烈,當局無增撥資源施以援手,反而政策開倒車踩多一腳,咁叫家庭暴力零容忍?市民對你哋零容忍至真呀!

港產官僚對家暴受害人冷漠無情,等如為虎作倀鼓吹歪風,小心自己有朝一日都會變成家暴受害者呀,到時後悔就遲嘞,叮!

第一手消息請下載on.cc東方互動iPhone/iPad/Android/Windows Phone Apps