SUN搞作：打橫嚟講：十九年裏只買一塊地？十九啦你！
香港廢柴政府官員劏房波因涉嫌囤地自肥，被傳媒踢爆一身蟻，在一個號稱「問責」的政治環境裏，本應早就收皮滾蛋啦！還須搞到幾千人冒着高溫日曬，上街遊行咒罵，促請下台咩？囤地波借神之名，唸中大校歌、推老婆（及其家人）做擋箭牌，還更有政府最高層包庇下，禮義廉地強硬公布：「誓不辭職！」何等卑劣！
囤地波太太昨日出錢「登廣告」聲明，撐「其又犯了事」的「家人」（今次唔係個仔，而係老公），文中當然力保老公；其中第三點話：「如果囤地，不會十九年裏只買一塊。」哼！咁都係「洗白白」的理由？好牽強並無邏輯啫！第一、十九年只買一塊地，不算囤地？要買幾多才算係呢？有個風水佬成世人只呃咗「一個」富婆幾十億之嘛！現要踎監呀！有一個收費亭工人成世人只在當更時執咗「一蚊」，唔上繳咋！又畀人拉咗啦！十九年來，只買一塊地，因買樓做劏房好搵囉！
今天，全港市民不滿的，不是「一塊地」！而係因這塊地所衍生的污穢嘢，原來愈揭愈臭。
香港有個書獎比賽，一位評審員的著作入了圍，他自行避席，不打分，這叫避嫌，也是道德彰顯，怎似得有官員擁有「唯一」的地皮，卻肆無忌憚的大力主催政府發展該地段，更厚顏到以大話冚大話，明明自簽合約，亦話唔記得！仲話已將股權賣了給「破產」的「家人的家人」！
囤地波老婆在聲明廣告亦指摘傳媒追蹤她，唉！如果你及其家人可光明正大站在陽光下與大家對話，而非於暗室發稿，人家又使鬼追蹤問你咩？
囤地波，快死開啦！香港之恥！
彭志銘
次文化考古學家，對城中潮語有深入研究，博徵博引，廢官廢人行埋一邊。
歡迎add我facebook 一齊(目及)實政府
