設計圖片及對白

由政府盛事基金贊助八百萬元嘅曼聯對傑志表演賽尋晚舉行，原本諗住藉球賽宣傳香港，但勢估唔到令香港揚名海外嘅唔係呢場球賽，而係香港大球場嘅爛泥草地，淪為國際笑話。其實，睇番盛事基金嘅往績，原來出乎意料嘅事屢見不鮮，睇嚟主席林健鋒都幾黑仔。

設計圖片及對白

贊助活動 幾度爛尾

盛事基金○九年成立，作為佢哋首輪贊助活動之一嘅梅窩水燈節，當年舉行國際搖櫓比賽同放孔明燈，但因為潮汐漲退問題，比賽只能遲開早收。大會原本打算將四十呎高嘅孔明燈升上天空，仲雄心壯志想諗住打破世界紀錄，點知喺點火時燈頂烈開，差啲搞到火燭收場。而前年一月原定喺香港舉行嘅帆船賽，就因負責籌辦賽事嘅單位更改國際賽安排，盛事基金明明決定贊助，但賽事都要擱置，香港市民最後都無緣觀賞呢場帆船賽。

再講，盛事基金年前開始贊助林村許願節，但有關團體為增添今年許願節嘅盛事氣氛，於是向盛事基金申請撥款打造一座十二米高嘅巨型風車，等市民許願祈福之餘仲可以轉個大運。點知有村民就嫌風車破壞風水，於是風車建成幾日就被迫拆卸，唔少市民都失望而回。

另外，好似上月贊助嘅香港龍舟嘉年華兼國際龍舟邀請賽，就因為遇上熱帶氣旋「貝碧嘉」，搞到比賽一度因天氣惡劣而暫停。盛事基金搞嘅「盛事」可以話係鑊鑊新鮮鑊鑊甘，睇嚟下次再搞盛事真係要擇過日子拜過神先得喇！

第一手消息請下載on.cc東方互動iPhone/iPad/Android/Windows Phone Apps