政壇：梁卓偉帶兒童樂團訪歐
香港兒童交響樂團在意大利演出，梁卓偉擔任指揮。
離開政府返香港大學任教嘅梁卓偉呢個星期四就正式擔任香港大學李嘉誠醫學院院長，佢喺上任前特別忙，上星期就同香港兒童交響樂團二三十名團員去意大利，喺拉戈堡嘅聖瑪利亞教堂演出，吸引唔少當地居民到教堂欣賞。
香港兒童交響樂團在意大利演出，梁卓偉擔任指揮。
佢仲同班年輕團員一齊參觀當地嘅名勝古蹟，著名嘅羅馬鬥獸場一定唔少得，梗係要同佢哋影張大合照，紀錄低到此一遊啦。今次歐洲之行，佢除咗去意大利，仲會去埋法國，總共演出五場音樂會，平均兩日至三日就演一場，行程都幾緊迫。除咗呢五場歐洲音樂會外，香港兒童交響樂團返港後，呢個月底仲會喺大會堂音樂廳舉辦一場「2013南歐歸來及暑期工作坊音樂會」，到時已成為院長嘅梁教授會擔任榮譽客席指揮，市民可以喺香港聽到佢哋嘅演出嘞！
