政壇：田二少獻計叫波波換位
田北辰
發展局局長「波波」陳茂波講明唔會下台辭職，反而一眾建制派議員就有新講法，好似新民黨副主席「田二少」田北辰就話，佢個人認為波波最多係蝦碌、戇居，罪不至下台，建議佢同商務及經濟發展局局長Greg蘇錦樑對調，相信阿Greg無咁多利益衝突，而波波亦可以發揮佢「搵錢」創意，咁咪一舉兩得囉！
田北辰
田二少話做生意咁多年，員工做得唔好，通常會幫佢調職，唔一定要炒咗佢。佢認為波波最叻「諗計仔」，如果佢去做商經局，分分鐘好過阿Greg。田二少識咗阿Greg好多年，話佢律師出身，無同地產商有咩瓜葛，做發展局就啱晒佢。
呢個建議都幾創新，但諗真啲就發現未必行得通，阿Greg個局鬼咁多火頭，又有網絡廿三條，免費電視又未發牌，咁多政治炸彈，波波未必頂得住，而且阿Greg本身係建仔黨員，有地產商亦同建仔關係密切，試問佢做咗發展局局長，利益衝突點會少呢？
